Adjudikaziodun hori: etxebizitza adjudikatu dizute

Atal honetan etxebizitza baten adjudikaziodun izan bazara beharrezko informazioa eta jarraitu beharko pausoak aurkituko dituzu.

Honako hau jakin behar duzu:

• Etxebiden izena eman ondoren, sarbidea izango duzu Euskal Autonomia Erkidegoko Etxebizitzen Parke Publikorako; horren helburua da etxebizitza sozial duin baterako sarbidea bermatzea, zure diru-sarreren araberako prezioan.
• Aplikatu beharreko araudiari  jarraikiz, etxebizitza baten adjudikaziodun bazara honako hauei buruzko beharrezko informazioa duen jakinarazpena jasoko duzu: etxebizitza, horren parkea edo programa, kontratua sinatzeko aurkeztu behar den dokumentazioa eta, etxebizitzari uko eginez gero, bete beharreko inprimakia.
• Ildo horretatik, Alokabidek hainbat parke eta etxebizitza-programa ditu alokairu soziala kudeatzeko. Jarraian, horien arteko aldeen azalpena duzu, baita eman beharreko pausoak ere:

Alokabide

Etxebizitzaren jabetza Alokabiderena da. Kontratua sinatzeko izapide guztiak gurekin egin beharko dituzu, arretarako edozein kanalaren bidez.

Eusko Jaurlaritza

Etxebizitzaren jabetza Eusko Jaurlaritzarena da. Kontratua sinatu arteko hasierako izapideak lurralde-ordezkaritzekin egin ditzakezu, eta haiekin harremanetan jar zaitezke Zuzenean (012) zerbitzuaren bidez. Gogoratu: behin kontratua sinatuta, Alokabidek etxebizitzaren gidak emango dizkizu.

Bizigune

Etxebizitzaren jabetza partikular batena da, eta horren gozamena Alokabideri lagatuko dio, erakundeak berak kudeatzeko. Kontratua sinatu arteko izapideak Alokabiderekin egingo dituzu; hortaz, prozesuan zehar ez zara inoiz harremanetan jabearekin jarri beharko.

Udala

Etxebizitzaren jabetza Udalarena da, eta, Udalak, bere eskumenen esparruan, adjudikazioa zuzenean kudeatu dezake. Hortaz, edozein zalantza izanez gero, Alokabiderekin edo zuzenean Udalarekin jar zaitezke harremanetan.

Kontratua sinatzeko pausoak

1. pausoa

Jakinarazpen bat jasoko duzu, etxebizitzaren ezaugarriei eta kontratuaren baldintzei buruzko informazioarekin.

Onartzen baduzu

2. pausoa

Interesatuta bazaude eta etxebizitza onartzen baduzu, jakinarazpeneko pausoak eman eta eskatutako dokumentazioa aurkeztu beharko duzu lehenbailehen.

3. pausoa

Eskatutako dokumentazioa aurkeztu ondoren, zurekin harremanetan jarriko gara honen berri emateko:

• Kontratua sinatzeari buruzko kontuak.
• Errentamenduak iraun bitartean hilabetean ordaindu beharreko errenta eta beste gastu batzuk.
• Kontratua formalizatzeko ordaindu behar den fidantzaren zenbatekoa; ezinbestekoa da ordainagiria aurkeztea sinaduraren egunean.
• Kontratuaren baldintzak.

Gogoan izan

---

Prozesuak aldaketa txikiak jaso ditzake adjudikatutako etxebizitza-parkearen arabera, batez ere kontratua sinatu arte harremanetan egon beharko zaren erakunde/organismoari dagokionean.

EZ baduzu onartzen

2. pausoa

Etxebizitza ez baduzu onartzen, UKO EGITEKO dokumentua sinatuta bidali beharko duzu jakinarazpenean jasotako edozein kanalera. Uko egite hori Etxebizitzaren euskal zerbitzua-Etxebideri jakinaraziko zaio.

Etxebizitzari buruzko ekainaren 18ko 3/2015 Legearen 13.2 artikuluan jasotakoaren arabera: Etxebizitza baten adjudikaziodunak uko egiten badio adjudikatutako etxebizitzari, lege hori garatzeko araudian salbuetsita ez dagoen arrazoi batengatik, baja emango zaio erregistroan eta ezin izango du berriro ere izena eman uko egin duenetik urtebete igaro arte.

Indarrean dagoen araudiak epe zehatzak xedatzen ditu onartu edo uko egiteko. Ezin bada pertsonarekin harremanetan jarri, eskatutako epean ez bada dokumentazioa aurkezten ala ez bada kontratua sinatzera bertaratzen, berehala etxebizitzari uko egitea ekarriko du.

Alokairu-kontratuari buruz: zure interesekoa izan daitekeena

Errentamendu-kontratuan honako hau jasoko da, besteak beste:

Alde Errentatzailea eta alde Errentaria

Errentatzailea etxebizitzaren jabea izango da. Etxebizitzaren jabetza Alokabiderena, Eusko Jaurlaritzarena, udalena edo beren etxebizitza Alokabidek kudeatutako Programetan (hala nola Bizigune) sartu nahi duten partikularrena izan daiteke.

Errentariak titularrak dira, alokairu-kontratua sinatzen dutenak, etxebizitzan beren bizikidetza-unitatearekin batera biziko direnak.

Kontratuaren iraupena eta berritzea

Kontratuaren iraupena, egin daitezkeen luzapenak barne, sinatzeko unean indarrean dagoen araudiaren araberakoa izango da.

Errentamendua amaitzen denean, estatu- eta autonomia-mailan indarrean dagoen legediak ezarritako sarrera-baldintzak egiaztatuko dira, baita etxebizitzaren egoera eta kontratu berria sinatzeko orduan balioetsi behar diren beste alderdi batzuk ere.

Zein da ordaindu beharreko errenta eta nola ordaindu

Errentamendua alokairuaren kontzeptuan hilero ordaindu behar den zenbatekoa da. Kopuru hori hilaren hasieran fakturatuko da, errentariek emandako kontuzenbakian.

Zein dira eragina duten gastuak

Errentariaren kontura izango dira etxebizitzaren banakako kontsumoei dagozkien gastuak, hala nola ur hotza/beroa, elektrizitatea, gasa, horien altak barne, edota komunitatearen gastuak, OHZ eta tasak, kontratuan hala jasoz gero.

Zein da ordaindu behar den fidantza

Kontratua sinatzeko orduan errentaren hileroko bat ordainduko da fidantzaren kontzeptuan.

Zein dira maizterraren betebeharrak

• Etxebizitza ohiko bizileku gisa erabiltzea.
• Errenta eta behar diren gastuak ordaintzea, baita banakako kontsumoak ere (ura, elektrizitatea, gasa).
• Alokabideri etxebizitzan bizi diren pertsona-kopuruaren berri ematea.
• Etxebizitza, partzela edo trastelekuak, halakorik balego, egoera eta higiene egokian mantentzea.
• Ohiko erabileragatik etxebizitzan bizi diren pertsonek eragindako higidura edo narriaduraren ondoriozko konponketak egitea.
• Kontratuan adierazitako beste alderdi batzuk.

Oharra

---

Adjudikatutako etxebizitza-motaren arabera, kontratuaren baldintzak eta errentari gisa eragina duten gastuak alda daitezke; hortaz, zalantzarik izanez gero, kontsultatu zure egoera.